Քանդակագործության ամբիոնն ակադեմիայի հիմնադիր ամբիոններից է: Այն ստեղծվել է ԽՍՀՄ ժողովրդական նկարիչներ Արա Սարգսյանի և Սուրեն Ստեփանյանի ջանքերով: Տարբեր տարիներին այս ամբիոնում աշխատել են անվանի քանդակագործներ Գրիգոր Ահարոնյանը, Սերգեյ Բաղդասարյանը, Արա Հարությունյանը, Երեմ Վարդանյանը, Թերեզա Միրզոյանը, Արշամ Շահինյանը և ուրիշներ:

Քանդակագործության ամբիոնի առարկայական ծրագրերի հիմքում դրված ռեալիստական, ակադեմիական սկզբունքները սերտորեն առնչվում են արվեստի ժամանակակից ընկալումներին:

Ուսուցման պրոցեսում մեծ տեղ է տրվում բնորդի պրոֆեսիոնալ ուսումնասիրմանը, քանդակագործության օրինաչափությունների ըմբռնմանը: Ամբիոնի հիմնական նպատակն է նաև զարգացնել ապագա քանդակագործի կոմպոզիցիոն մտածողությունը: Մեծ ուշադրություն է դարձվում քանդակի պլաստիկային, նյութերի /գիպս, փայտ, քար, կավ, բրոնզ/ տեխնոլոգիային, կատարման տեխնիկային և այլ կարևոր հարցերի:

Ինչպես գեղանկարչության բաժնում, քանդակագործության ամբիոնում նույնպես, երրորդ կուրսից սկսվում է ուսուցման արվեստանոցային համակարգը:

Արվեստանոցները ղեկավարում են մեծ համբավ ու դասախոսական աշխատանքի փորձ ունեցող պրոֆեսորներ Թերեզա Միրզոյանը, Գետիկ Բաղդասարյանը, դոցենտ Թադևոս Գևորգյանը:

Վեցերորդ կուրսում ուսանողները կատարում են դիպլոմային աշխատանքներ:

Ուսանողների դիպլոմային նախագծերում արտահայտվում են նրանց մասնագիտական գրագիտությունը, կոմպոզիցիոն մտածողությունը, գաղափարական ասելիքը, գեղագիտական ճաշակը:

Քանդակագործության բաժինն իր գոյության 54 տարիների ընթացքում տվել է մեծ թվով շրջանավարտներ, որոնցից շատերը ճանաչում ունեն նաև արտասահմանում: Երևանի Գեղարվեստի Ակադեմիան ավարտած քանդակագործներն արդեն մի քանի տարի շարունակ արժանանում են Դանթեին նվիրված միջազգային բիեննալեի առաջին մրցանակներին: Ավելին՝ 1998 -ին. Ռավեննայի բիեննալեին մասնակցած 12 քանդակագործներ արժանացան Ֆլորենցիա քաղաքի ոսկե մեդալին, իսկ Հայաստանը համարվեց լավագույն քանդակագործություն ներկայացնող երկիր:

Այսօր ամբիոնում աշխատում են այնպիսի անվանի պրոֆեսորներ, ինչպիսիք են Գետիկ Բաղդասարյանը, Թերեզա Միրզոյանը, Արշամ Շահինյանը, Տարիել Հակոբյանը և ուրիշներ:

Ակադեմիան պետականորեն հաստատված պլանների և առարկայական ծրագրերի միջոցով բարձր որակի մասնագետներ է պատրաստում քանդակագործության ստեղծագործական աշխատանքների, ինչպես նաև քանդակագործության և գծանկարչության գծով մանկավարժական գործունեության համար։ Ուսուցման ձևը` առկա։ Ուսուցման տևողությունը բակալավրիատի ուսումնական ծրագրով` 4 տարի, մագիստրատուրայի ուսումնական ծրագրով` 2 տարի։
Ընդունելությունը կատարվում է մրցութային կարգով` «Գծանկարչություն», «Քանդակագործություն», «Կոմպոզիցիա» առարկաների  քննությամբ։
Արտասահմանի քաղաքացիները ակադեմիա ընդունվում են ըստ ՀՀ կառավարության հաստատած կարգի, առանց ընդունելության քննությունների։