Երևանի գեղարվեստի պետական ակադեմիան ստեղծվել է 1945թ.: Հիմնադրման պահին ուներ ընդամենը 2 բաժին՝ գեղանկարչություն և քանդակագործություն՝ 22 ուսանողով: 1953թ.-ից մինչև 1994թվականը գործել է թատերական ինստիտուտի հետ համատեղ: 1994թ. առանձնացել է որպես ինքնուրույն բուհ, իսկ 2000թ. ՀՀ կառավարության որոշմամբ վերանվանվել է Երևանի գեղարվեստի պետական ակադեմիա: Ներկայումս ունի երկու ֆակուլտետ՝

·         Կերպարվեստի

·         Դիզայնի և դեկորատիվ կիրառական արվեստի:

                Ուսանողների քանակը՝ 764, որից 92-ը արտասահմանցիներ են: Ակադեմիան ընդունելություն է կատարում 8 մասնագիտությունների գծով՝

·         Գեղանկարչություն,

·         Քանդակագործություն,

·         Գրաֆիկա,

·         Կերպարվեստի պատմություն և տեսություն,

·         Դիզայն,

·         Դեկորատիվ կիրառական արվեստ,

·         Հագուստի մոդելավորում,

·         Համակարգչային գեղարվեստական նախագծում:

                Ունի երկու մասնաճյուղ՝ Գյումրիում և Դիլիջանում: Գյումրիի մասնաճյուղն ընդունելություն է կատարում չորս մասնագիտությունների գծով, ունի 169 ուսանող, Դիլիջանը՝ 1 մասնագիտության գծով, ունի 34 ուսանող: Ակադեմիան ունի համակարգչային լսարաններ, պահանջվող քանակի արվեստանոցներ, լաբորատորիաներ, գրադարան, ցուցասրահ, թանգարան: Կարևոր նշանակություն է տրվում տեղեկատվական ցանցի զարգացմանը: Ակադեմիան անցել է կրեդիտային համակարգով եռաստիճան ուսուցման: Բակալատուրայի՝ 4 տարի, մագիստրատուրա 2, ասպիրանտուրա 3 տարի ուսումնական ծրագրերով:

          Ակադեմիայի առաքելությունը

                Երևանի գեղարվեստի պետական ակադեմիայի հիմնական առաքելությունն է՝ բարձր որակավորման մասնագետներ պատրաստել արվեստի տեսության, կերպարվեստի, դիզայնի, դեկորատիվ կիրառական արվեստի բնագավառների համար: Ստեղծագործական և կրթական գործընթացը համապատասխանեցնել հասարակական կյանքի և մշակույթի զարգացման արդի պահանջներին`

·         Ուսանողներին նախապատրաստել մասնագիտական առաջընթացին և հարատև ուսուցմանը՝ կյանքի նոր պահանջներին համապատասխան:

·         Նպաստել ոչ միայն արվեստագետի, այլ նաև քաղաքացու ձևավորմանը:

·         Դառնալ տարածաշրջանում ոչ միայն ուսումնական, այլ նաև մշակութային զարգացման կենտրոն:- ուսուցանել և քարոզել ոչ միայն ազգային, այլ նաև համամարդկային մշակութային արժեքները:

          Ակադեմիայի հեռանկարը

            Ակադեմիան ձգտում է դառնալ.

·         Բարձրագույն հաստատություն, որի դռները բաց են շնորհալի, բնածին օժտվածություն և արվեստի նկատմամբ մեծ սեր ունեցող յուրաքանչյուր անհատի համար (ինչպես տեղացի, այնպես էլ արտասահմանցի)  :

·         Հաստատություն, որը պետք է ոչ միայն ուսումնական ծրագրեր իրականացնի, այլ նաև դառնա հանրապետության մշակութային զարգացման կարևոր կենտրոն:

·         Հաստատություն, որն ուսանողներին նախապատրաստում է ստեղծագործական գործունեության, մշակույթի ոլորտի նորարարության համար:

·         Հաստատություն, որն ուսուցման պրոցեսը կազմակերպում է տեսության և պրակտիկայի համակցման սկզբունքներով:

·         Հաստատություն, որն ըստ անհրաժեշտության կիրառում է տեղեկատվական բարձր տեխնոլոգիաներ:

·         Հաստատություն, որն արտաքին կապեր է ստեղծում, նպաստում դասախոսների և ուսանողների շարժունակությանը:

·         Հաստատություն, որն իր գոյության 60 տարիներին ստեղծած ուսուցման ավանդույթները սերտորեն առնչում է ժամանակի ոգու և պահանջների հետ: Դրան համապատասխան վերափոխում ուսումնական պլաններն ու ծրագրերը:

·         Հաստատություն, որն իր քաղաքականության կարևոր խնդիրն է համարում ակադեմիայի վարկի էլ ավելի բարձրացումը, միջազգային ճանաչումը և Եվրոպական ուսուցման համակարգին ինտեգրացումը:

          Ակադեմիայի մնայուն արժեքները

                Ակադեմիան իր տասնամյակների պատմության ընթացքում ձևավորել է մնայուն արժեքներ, որոնք միավորում են դասախոսների և ուսանողների մի քանի սերունդներ, և որոշում նրա բացառիկ դերը հայ մշակույթի զարգացման գործում:

            Ակադեմիայի մնայուն արժեքներն են`

·         Նրա կայուն դիմանկարը, տարիների ընթացքում ստեղծած դպրոցը: Հավատարիմ է իր ավանդույթներին և պարտավորված է զարգացնել և ժամանակի ոգուն համահունչ առաջ տանել և փոխանցել հաջորդ սերունդներին:

·         Ուսանողների ստեղծագործական ունակությունների բացահայտումն ու զարգացումը, տաղանդի հայտնաբերումը:

·         Պատասխանատվությունը ազգային մշակույթի զարգացման ոչ միայն ներկայի, այլ նաև ապագայի համար:

·         Ուսանողների և դասախոսների ստեղծագործական մտքի զարգացմանն անհրաժեշտ բարոյահոգեբանական միջավայրը:

·         Գեղագիտական նոր գաղափարների ոգեշնչումն ու քարոզչությունը:- ուսանողներին ակադեմիայի կառավարման համակարգում ընդգրկելը:

·         Ուսուցման բարձր որակը:

                Ակադեմիան այսուհետ նույնպես այն պիտի պահպանի, արտաքին կապեր ստեղծի և դառնա մրցունակ ու գրավիչ ոչ միայն տարածաշրջանում, այլ նաև Եվրոպական ուսումնական տարածքում:

                Ակադեմիան ուսուցման որակը պիտի գնահատի Եվրոպական չափանիշներով, իսկ դրա համար պետք է կիրառի ոչ միայն այն խթանող մեխանիզմներ, այլ նաև յուրացնի ու ներդնի ուսուցման որակի գնահատման և արժեվորման Եվրոպական մեխանիզմներ`

·         Ակադեմիան պետք է ապահովի դասախոսների, ուսանողների, վարչական անձնակազմի շարժունակությունը այն նպատակով, որ նրանք կարողանան օգտվել կրթության Եվրոպական տարածքի կրթական ժառանգությունից՝ ներառյալ նրա ժողովրդավարական արժեքները, բարձրացնի կրթական համակարգերի բազմազանությունը:

·         Ակադեմիայի կարևոր արժեքն է ոչ միայն ազգային մշակույթի ուսումնասիրությունն ու յուրացումը, այլ նաև ծանոթությունը տարբեր ժողովուրդների մշակույթների պատմությանը և բոլորի համար ընդհանուր հանդիսացող Եվրոպական քաղաքակրթությանը:

·         Հատուկ ուշադրություն ոչ միայն մայրենի լեզվին, այլ նաև օտար լեզուներին (ռուսերեն, անգլերեն, ֆրանսերեն)  : 

          Ակադեմիայի զարգացման քաղաքականության նպատակները

                Խնդիր1.

            Ապահովել ուսանողների համակազմի կայուն զարգացումը: 

                Երևանի գեղարվեստի պետական ակադեմիան եղել է և շարունակում է լինել հանրապետության կերպարվեստի, կիրառական արվեստի, դիզայնի և մշակութային այլ ճյուղերի հիմնական բարձրագույն կրթօջախը: Հետևաբար իր ներուժի հաշվառմամբ նա պետք է շարունակի պահպանել իր ուսանողական համակազմը: Պետք է իրականացնի նաև ուսումնառության այլընտրանքային ծրագրեր, համապատասխանեցնի դրանք միջազգային չափանիշներին, իրականացնի շարունակական և լրացուցիչ կրթական ծրագրեր ու ծառայություններ բոլոր նրանց համար, ովքեր կարիք ունեն մշակույթի ոլորտի մասնագիտական վերապատրաստման կամ լրացուցիչ ուսումնառության: Ակադեմիան նպատակ ունի զարգացնել ուսանողական համակազմի միջազգայնացումը: Վերջին տասնամյակում բարձրացել է բուհի վարկանիշը ոչ միայն երկրում, այլ նաև տարածաշրջանում:Ակադեմիան միջոցներ պետք է ձեռնարկի այն ավելի կայուն դարձնելու, ավելի մեծ թվով արտասահմանցի ուսանողներ ընդունելու, առավել ուշագրավ լինելու և տարածաշրջանում կարևոր մշակութային կենտրոն դառնալու ուղղությամբ:

            Ռազմավարական այս ծրագիրն իրականացնելու համար բուհը պետք է իրականացնի հետևյալ խնդիրները.

            ա)  Հստակեցնի ակադեմիայի ընդունելության հեռանկարային պլանը, հիմք ընդունելով պահանջարկը:

            բ)   Արվեստի տեսություն մասնագիտության գծով կազմակերպի հեռակա ուսուցում:

            գ)   Օտարերկրյա ուսանողների մասնագիտական ուսուցումը մատչելի ձևով կազմակերպելու նպատակով նախապատրաստական աշխատանքներ տանի նրանց ուսումնական պրոցեսը անգլերեն լեզվով կազմակերպելու համար:

                դ)   Զարգացնի համագործակցությունը արտասահմանի արվեստի առաջատար բուհերի հետ: Մշակի համատեղ ուսումնական ծրագրեր և ըստ հնարավորինս համապատասխանեցնի որակավորումների աստիճանները:

                ե)   Հանրապետության մշակութային զարգացման միտումներին համահունչ զարգացնի և ապակենտրոնացնի հատկապես դեկորատիվ կիրառական արվեստի, դիզայնի, գրաֆիկայի մասնագիտական ուսուցումը ոչ միայն մայրաքաղաքում և եղած մասնաճյուղերում, այլ նաև նոր տարածքներում՝ հիմք ընդունելով տեղի ստեղծագործական ներուժն ու պահանջարկը:

                Խնդիր 2.

            Որպես քաղաքական կարևոր խնդիր, միջոցներ ձեռնարկել դիմորդների հոսքի կայունությունն ապահովելու ուղղությամբ:

                Այդ նպատակով ակադեմիան պետք է՝

            ա) Միջոցներ ձեռնարկի ակադեմիայի քոլեջ ստեղծելու նպատակով, լուծի համապատասխան տարածքի հարցը:

                բ)   Մայր բուհում և մասնաճյուղերում ստեղծի նախապատրաստական բաժիններ:

                գ)   Գովազդի ակադեմիայում ուսուցանվող մասնագիտությունները:

                դ)   Միջոցներ ձեռնարկի ակադեմիայի գովազդը Հայաստանից դուրս նույնպես կազմակերպելու ուղղությամբ արտասահմանյան դիմորդներին հետաքրքրելու նպատակով: Դրա համար պարբերաբար վերանայի ակադեմիայի սայթը, հրատարակի բուկլետներ, կազմակերպի արտասահմանյան փոխայցելություններ և այլն: Ուսումնասիրի տարածաշրջանի պահանջարկը և անհրաժեշտության դեպքում ակադեմիայի ներուժը կիրառի դրանց համապատասխան նոր մասնագիտություններ բացելու և ուսուցում կազմակերպելու ուղղությամբ:

                Խնդիր 3.

            Նախադրյալներ ստեղծել ակադեմիայի համակազմի պահպանման և կայունացման ուղղությամբ: 

                Քաղականության հիմնական ուղղությունները.

                ա)  Իրականացնել մասնագիտական ուսուցման վերլուծություններ և միջոցներ ձեռնարկել ակադեմիայի մրցունակության առավել բարձրացման ուղղությամբ:

                բ)   Իրականացնել ուսանողական համակազմի զարգացման միասնական ընդհանուր ակադեմիական պլան, հաշվի առնելով ուսումնական ծրագրերի և մասնագիտությունների ուսուցման որակի ապահովման ներքին ռեսուրսները (դասախոսական, նյութատեխնիկական, ֆինանսական)  :

                գ)   Ըստ մասնագիտությունների սահմանել ընդունելության տարբերակված պահանջներ և տեղեկացնել դիմորդներին նախապես:

                դ)   Աջակցել ուսանողների և շրջանավարտների աշխատանքի որոնման գործընթացին,ստեղծել մասնագիտական կողմնորոշման ծառայություններ:

                ե)   Միջոցներ ձեռնարկել ուսման առաջադիմությունը խթանելու և ուսանողների ստեղծագործական ներուժը զարգացնելու ուղղությամբ:

                զ)   Միջոցներ ձեռնարկել պետական կրթաթոշակների և ուսումնական նպաստների առավել արդյունավետ և օբյեկտիվ տրամադրման, ինչպես նաև ուսումնական վարկերի նորաստեղծ համակարգի ընձեռած հնարավորությունների սահմաններում ուսանողներին աջակցելու ուղղությամբ: 

          Բոլոնիայի գործընթացի պահանջներին համահունչ բարձրացնել ուսուցման որակը և արդյունավետությունը:

                Ակադեմիայի շրջանավարտների բարձր պրոֆեսիոնալիզմը և մրցունակությունը մեծ մասամբ կապված է ուսուցման որակից: Որքան կարևոր են ուսուցման ծրագրերը, դրանց որակական նոր փոփոխությունները, նույնքան կարևոր են նաև դասախոսական կազմի ստեղծագործական որակն ու դասավանդման մեթոդիկան: Այս առումներով կարևորվում է ակադեմիայի մերձեցումը Եվրոպական բարձրագույն կրթական տարածքի և հատկապես Եվրոպական մշակութային բուհերի ուսուցման սկզբունքներին, Բոլոնիայի գործընթացի պահանջներին: Իսկ դա ենթադրում է անցում ուսուցման կազմակերպման Եվրոպական կրեդիտային համակարգին (ECTS)  :

                Արվեստի բուհում բակալավրի ծրագրով ուսուցման արդյունավետ կազմակերպման համար չափազանց կարևոր է ուսանողների ստեղծագործական ունակությունների գործոնը: Վերջինս թելադրում է ուսուցման տարբերակված մոտեցումներ՝ հիմք ընդունելով ուսանողների ոչ միայն ունակությունները, այլ նաև նախասիրությունները: Այս ամենի հաշվառմամբ կարևորվում է ուսուցման պրոցեսի համարժեք կազմակերպման և դրական արդյունքի հասնելու գործոնը, որը պետք է լինի ուսուցման արդյունավետության հիմնական չափանիշը:

Որակի ապահովումն առանձնահատուկ նշանակություն է ստանում մասնագիտական ծրագրով ուսուցման հարցում:Այստեղ ստեղծագործական պրակտիկ կատարողական ուսուցման պրոցեսը զուգակցվում է ուսանողների տեսական վերլուծական ունակությունների զարգացման հետ:

            Խնդիր 1.

            Այս խնդիրների իրականացման համար պետք է մշակել և ներդնել ուսուցման որակի գնահատման նոր համակարգ և համապատասխանեցնել այն մշակույթի բարձրագույն կրթության Եվրոպական չափանիշներին: 

            Քաղաքականության հիմնական ուղղությունները.

                ա)  Մշակել ակադեմիայում ուսուցման որակի ապահովման հայեցակարգը և հստակեցնել կառավարման օղակների պարտականությունները:

                բ)   Մեխանիզմներ ստեղծել կրթական ծրագրերի բովանդակության և ուսուցման որակի ինքնավերլուծության համար:

                գ)   Մշակել ակադեմիայի կրթական ծրագրերի իրականացման և որակի գնահատման փուլային գործընթաց:

                դ)   Հստակեցնել ուսման որակի ներքին գնահատման համակարգը:

                ե)   Ուսուցման արդյունավետության ստուգման համար վերլուծել և կատարելագործել ուսանողների ամփոփիչ ատեստավորման համակարգը:

                զ)   Նախապատրաստել ակադեմիայի հավատագրման գործընթացը:

                է)   Կատարելագործել ուսուցման որակի գնահատման չափանիշների թափանցիկությունը:

                ը)   Ապահովել որակի գնահատման միասնական պահանջներ և չափանիշներ մայր բուհում և մասնաճյուղերում:

            Խնդիր 2.

            Եվրոպական կրթական ծրագրային չափանիշներին համահունչ ձեռնարկվող կրթական ծրագրերի վերանայման և համապատասխանեցման փուլային միջոցառումներ: 

                ա)  Վերանայել ակադեմիայի մասնագիտությունների ցանկը:

                բ)   Վերանայել մասնագիտացումները և հարկ եղած դեպքում, հիմք ընդունելով շուկայի պահանջարկը, ուսանողների նախասիրությունները, ակադեմիայի նյութական ռեսուրսներն ու դասախոսական ներուժը նախաձեռնել նոր մասնագիտությունների ուսուցումը:

                գ)   Ստեղծել կրեդիտային համակարգի ներդրման համար անհրաժեշտ մեթոդական, տեղեկատվական, ուսուցման ծրագրերին վերաբերող տեղեկատվական փաթեթ:

                դ)   Միջոցներ ձեռնարկել ուսումնական գործընթացի վերափոխություններին ուսանողների տեղյակությունն ապահովելու համար:

                ե)   Կարևոր նշանակություն տալ շրջանավարտների ձեռներեցության և կառավարման ունակությունների զարգացմանը:

            Խնդիր 3.

                Մշակել և ներդնել ակադեմիայում ուսուցման կազմակերպման կրեդիտային համակարգը և ապահովել համատեղելիություն կրեդիտների կուտակման և փոխանցման Եվրոպական (ECTS)   համակարգի հետ:

            Քաղաքականության հիմնական ուղղությունները.

                ա)  2007-2008 ուս. տարվանից ներդրվել է կրեդիտային համակարգը ակադեմիայի բակալատուրայի ծրագրում:

                բ)   Պլանավորվել է և մինչև 2010թ. պետք է իրականացվի բակալավրիատի և մագիստրատուրայի բոլոր մասնագիտությունների գծով անցումը կրեդիտային համակարգին: Բարձրացնել ուսանողների ինքնուրույն աշխատանքների դերը և համապատասխան փոփոխություններ մտցնել ուսումնական գործընթացում:

                գ)   Աշխատանքներ են տարվում դասախոսների և ուսումնավարչական անձնակազմին այդ համակարգին ծանոթացնելու ուղղությամբ:

                դ)   Ակտիվացվում է ուսանողների անմիջական մասնակցությունը ուսումնառության գործընթացի պլանավորմանը և ուսումնառության այլընտրանքային հնարավորություններին: Աշխատանքներ են տրավում այս գործերի կազմակերպման հարցում խորհրդատուների կոորդինացնող դերի բարձրացման, դրանցում ակադեմիայի փորձառու դասախոսներին ընդգրկելու ուղղությամբ:

                ե)   Նոր համակարգի պահանջներին համապատասխան վերափոխվել է ակադեմիայի ուսումնական գործի կազմակերպման կառույցը:

                զ)   Ստեղծվել է դասընթացներին ուսանողների գրանցման և ուսման առաջադիմության տվյալների կառավարման էլեկտրոնային համակարգ:

                է)   Աշխատանքներ են տարվում ուսանողների շարժունակությանը նպաստելու ուղղությամբ հատկապես ընդհանուր Եվրոպական բարձրագույն կրթական տարածքում: Այդ նպատակով դասընթացների կառուցվածքը և ուսումնառության արդյունքների գնահատման չափանիշները համապատասխանեցվել են ECTS-ի պահանջներին:

            Խնդիր 4.

                Ուսումնառության որակի և արդյունավետության բարձրացման նպատակով կատարելագործել դասավանդման մեթոդիկան և որակի ապահովմանը նպաստող մեխանիզմները:

            Այդ նպատակով.

                ա)  Կատարելագործվում է գնահատման համակարգը ուսումնառության որակը և ուսանողների շահագրգռվածությունը խթանելու տեսանկյունից:

                բ)   Միջոցներ են ձեռնարկվում ուսանողների մասնագիտական հետաքրքրությունների հաշվառման և հնարավորինս բավարարման համար:

                գ)   առավել արդյունավետ է դարձվում ուսանող-դասախոս համագործակցությունը:

                դ)   Միջոցառումներ են մշակվում ուսանողների գործնական ունակությունների զարգացման համար, կատարելագործվում է արտադրական պրակտիկան, միջոցներ են ձեռնարկվում հատկապես ավարտական կուրսի ուսանողների և ենթադրվող գործատուների միջև կոնտակտ ստեղծելու ուղղությամբ:

                ե)   Նախատեսվում է ավելի զարգացնել ուսանողների համակարգչից օգտվելու, դրամաշնորհային ծրագրերի մշակման և գրագիտական այլ ունակությունները:

                զ)   Ուսումնասիրվում և անհրաժեշտության դեպքում ներառվում է ուսուցման մեթոդիկայի արտասահմանյան դրական փորձը:

                է)   Խթանվում է ակադեմիայի հատկապես արվեստաբանության գծով հետազոտական ծրագրերի իրականացումը: