Գեղանկարչության ամբիոնը Երևանի Գեղարվեստի ակադեմիայի առաջատար ամբիոններից է: Այն ստեղծվել է ակադեմիայի հիմնադրման օրվանից՝ 1945 -ին: Առաջին ամբիոնի վարիչն էր Գաբրիել Գյուրջյանը: Այստեղ աշխատել են անվանի գեղանկարիչներ Մարտիրոս Սարյանը, Հակոբ Կոջոյանը, Հովհաննես Զարդարյանը, Էդուարդ Իսաբեկյանը, Արա Բեքարյանը, Բաբկեն Քոլոզյանը և ուրիշներ: 50-ական թվականներին գեղանկարչության ամբիոնում իր ներդրումն է արել նաև Լենինգրադի Գեղարվեստի ակադեմիայի պրոֆեսոր Օսմյորկինը: Տասնյակ տարիների ընթացքում ամբիոնի ձեռք բերած փորձն ու դասավանդման հմտություններն այսօր հաջողությամբ կիրառում են ավագ ու միջին սերնդի անվանի գեղանկարիչները:

Ամբիոնը մշակել և իրականացնում է գեղանկարի և կոմպոզիցիայի ուսուցման միջազգային չափանիշներին համապատասխանող ուսումնական ծրագրեր, որոնց հիմքում ընկած են իրատեսական և ակադեմիական դպրոցի սկզբունքները և ժամանակակից արվեստի հիմնախնդիրները: Հիմնական մասնագիտական առարկաներին զուգահեռ, ամբիոնում մեծ ուշադրություն է դարձվում պլաստիկ անատոմիային, նյութերի տեխնոլոգիայի ուսումնասիրմանը և այլ առարկաների: Ամբիոնի անդամները հետամուտ են ուսանողներին պրոֆեսիոնալ բարձր գիտելիքների հաղորդմանը: Կոմպոզիցիոն մտածողության զարգացման հետ մեկտեղ, մեծ ուշադրություն է դարձվում գեղանկարչական աշխատանքների կատարման տեխնիկայի տիրապետմանը: 

Գեղանկարչության ամբիոնում քսան տարուց ավելի է, ինչ ուսուցումը տարվում է արվեստանոցային ձևով: Երրորդ կուրսից սկսած, ուսանողները, իրենց ցանկությամբ, ընտրում են երեք արվեստանոցներից մեկը: Արվեստանոցների ղեկավարները հանրապետության ճանաչված և լավագույն գեղանկարիչներն են՝ պրոֆեսորներ Էդ. Իսաբեկյանը, Ա.Պապյանը, Փ.Միրզոյանը: Տարիների փորձը հաստատել է ուսուցման արվեստանոցային համակարգի մեծ առավելությունը: Բոլոր արվեստանոցներն էլ որոշակի ուղղվածություն ունեցող յուրատեսակ դպրոց են: Այստեղ հատուկ նշանակություն է տրվում ապագա արվեստագետի անհատականության ձևավորմանը:

Գեղանկարչության ամբիոնի առարկայական ծրագրերում մեծ նշանակություն է տրվում ուսանողների ամառային ուսումնական պրակտիկային պլեներում, ինչպես նաև՝ դասական վարպետների աշխատանքների ընդօրինակմանն՝ Ազգային պատկերասրահում:

Արվեստանոցների ղեկավարներից բացի, ամբիոնում աշխատում են նաև մեծ ճանաչում ունեցող պրոֆեսորներ Ս.Մուրադյանը, Մ.Սեդրակյանը, Մ.Գրիգորյանը, Էդ. Վարդանյանը, Ա.Իսաբեկյանը, Ա.Գրիգորյանը և ուրիշներ:

Ակադեմիան պետականորեն հաստատված պլանների և առարկայական ծրագրերի միջոցով բարձր որակի մասնագետներ է պատրաստում հաստոցային գեղանկարչության ստեղծագործական աշխատանքի, ինչպես նաև գեղանկարչության գծով մանկավարժական գործունեության համար։ Ուսուցման ձևը` առկա։ Ուսուցման տևողությունը բակալավրիատի ուսումնական ծրագրով` 4 տարի, մագիստրատուրայի ուսումնական ծրագրով` 2 տարի։
Ընդունելությունը կատարվում է մրցութային կարգով` «Գծանկարչություն», «Գեղանկարչություն», «Կոմպոզիցիա» առարկաների  քննությամբ։
Արտասահմանի քաղաքացիները ակադեմիա ընդունվում են ըստ ՀՀ կառավարության հաստատած կարգի, առանց ընդունելության քննությունների։