«Եվրոպական Ժառանգության օրեր»-ը

Մ. Սարյանի տուն-թանգարանում

Արդեն մի քանի տարի է, ինչ Երևանի թանգարանային կյանքում գեղեցիկ ավանդույթ է դարձել «Եվրոպական ժառանգության օրեր» ծրագրի շրջանակներում միջոցառումների կազմակերպումը: Այս տարի այն նշվեց սեպտեմբերի 19-ին:Այդ օրվան նվիրված Մ. Սարյանի տուն-թանգարանում տեղի ունեցավ գեղանկարչական ցուցահանդես-մրցույթ Հայաստանի գեղարվեստի ակադեմիայի ուսանողների մասնակցությամբ: Այն կրում էր «Նոր Նախիջևանյան բնանկար» խորագիրը: Թեման ընտրվեց Նոր Նախիջևանի բնության պատկերումը, քանի որ այս տարի լրանում է մեծ գեղանկարչի՝ Մ. Սարյանի ծննդավայրի՝ Նոր Նախիջևանի /այժմ Դոնի Ռոստովի շրջան/ հիմնադրման 230-ամյակը: Հայաստանի գեղարվեստի ակադեմիայի դեկան Խ. Ազիզյանի աջակցությամբ ընտրվեց գեղանկարչության բաժնի վեց ուսանող՝ Արմեն Հարությունյան, Նարեկ Արզումանյան, Աստղիկ Մելքոնյան, Սևադա Պետրոսյան, Գեղամ Գեղամյան, Հռիփսիմե Առաքելյան: Ուսանողները միջոցառումից հինգ օր առաջ հրավիրվեցին թանգարան, ուր անցկացվեց էքսկուրսիա, այնուհետև ցուցադրվեց Նոր նախիջևանի մասին տեսաֆիլմ և բնությունը պատկերող լուսանկարներ, որոնց միջոցով նրանք ծանոթացան Մ.Սարյանի բնօրրանին: Արդեն բուն միջոցառման օրը՝ սեպտեմբերի 19-ին, նրանք եկան թանգարան և Մ.Սարյանի արվեստանոցում կտավին հանձնեցին հարավ-ռուսական այդ երկրամասի բնությունից ստացած իրենց տպավորությունները: Աշխատում էին նկարչի որդու՝ կոմպոզիտոր Ղ. Սարյանի երաժշտության հնչյունների ներքո: Մթնոլորտը, որտեղ ստեղծագործում էին ուսանողները, լեցուն էր Վարպետի կտավներից ճառագող լույսով, ստեղծագործական լիցքերով: Նկարները մոտ մեկ ամիս ցուցադրվեցին նկարչի արվեստանոցում: Այդ ընթացքում թանգարանի այցելուները և աշխատակազմը հնարավորություն ունեցան իրենց տպավորությունները արտահայտելու և գնահատելու՝ նշումներ կատարելով յուրաքանչյուր մասնակցին հատկացված թերթիկում: Արդյունքում հաղթող ճանաչվեց գեղանկարչության բաժնի 2-րդ կուրսի ուսանող Նարեկ Արզումանյանի աշխատանքը: Արդյունքները ամփոփելուց հետո ուսանողները հրավիրվեցին թանգարան, որտեղ նրանց հանձնվեցին մրցանակներ: Ծրագրի նպատակն էր կապ ստեղծել ուսանողների և թանգարանի միջև, քանի որ թանգարանը, բացի մշակութային օջախ լինելուց, ծավալում է նաև կրթադաստիարակչական-գործունեություն: Հենց այս նպատակն է հետապնդում Մ. Սարյանի տուն-թանգարանում կազնակերպված նմանօրինակ միջոցառումները: Թանգարանի տնօրինությունը կարծում է, որ այս միջոցառումը հիմք կդառնա Մ. Սարյանի տուն-թանգարանի և Հայաստանի գեղարվեստի ակադեմիայի միջև մեծ համագործակցության և բարի ավանդույթ՝ բոլոր ժամանակներում, քանի որ երիտասարդ նկարիչները մշտապես ոգեշնչման, խրախուսման կարիք ունեն:

Մարտիրոս Սարյանի տուն-թանգարան

Տնօրեն՝ Ռուզան Սարյան

Գեղանկարչական ցուցահանդես-մրցույթի կազմակերպիչ՝Ժաննա Մանուկյան