2009թ.-ի սեպտեմբերի 27-ից հոկտեմբերի 6-ը Լիբանանի մայրաքաղաք Բեյրութում անցկացվեցին Ֆրանկոֆոնիայի 6-րդ միջազգային խաղերը: Բեյրութում էին մեկտեղված աշխարհի շուրջ 60 պետությունից ավելի քան 3000 արվեստի և սպորտի երիտասարդ` մինչև 35 տարեկան գործիչներ: Միջազգային այս հավաքին իր մասնակցությունն էր ցուցաբերում նաև հայկական պատվիրակությունը, որում ընդգրկված էին սպորտի, պարարվեստի, երգարվեստի, կերպարվեստի ներկայացուցիչներ: Գեղանկարչության բնագավառը ներկայացնում էր ԵԳՊԱ-ի գեղանկարի բաժնի շրջանավարտ, այժմ ԵԳՊԱ-ի ասպիրանտ Արթուր Հովհաննիսյանը:

Ֆրանկոֆոնիայի Միաջազգային խաղերի պաշտոնական բացման արարողությունը տեղի ունեցավ Բեյրութի կենտրոնական մարզադաշտում: Արարողությանը ներկա էին Լիբանանի նախագահը, Լիբանանի վարչապետը, Ֆրանսիայի վարչապետը և այլ բարձրաստիճան հյուրեր:

Ֆրանկոֆոնիայի 6-րդ միջազգային խաղերի շրջանակներում անցկացվեցին բազմաթիվ և բազմաբնույթ միջոցառումներ, որոնք նպատակ ունեյին համախմբել տարբեր մշակույթներ ներկայացնող երիտասարդ գործիչների: Հարկ է առանձնացնել սեպտեմբերի 27-ին Բեյրութում Յունեսկոյի պալատի ցուցասրահում բացված ցուցահանդեսը: Վերջինիս ներկայացված էին տարբեր աշխարհամասերից մի շարք արվեստագետների մեկական գեղանկարչական, լուսանկարչական աշխատանքներ, ինչպես նաև քանդակներ: Ցուցադրությանը ներկայացված էր նաև Արթուր Հովհաննիսյանի ստեղծագործությունը: Ցուցահանդեսի բացման արարողությանը ներկա էին բազմաթիվ մշակույթի և քաղաքական գործիչներ, այդ թվում Մոնակոյի արքայազն` Ալբերտը, Լիբանանի մշակույթի նախարար` Թամամ Սալամը և ուրիշներ:

Ֆրանկոֆոնիայի միջազգային խաղերի շրջանակներում տեղի ունեցան մի շարք հանդիպումներ ճանաչված արվեստագետների հետ, ինչպես նաև տրամադրվեցին ընդարձակ և լուսավոր արվեստանոցներ և համապատասխան նյութեր, որպեսզի խաղերի մասնակից արվեստագետները տեղում ստեղծագործեն: Այդ ընթացքում արվեստանոցներ էին այցելում բազմաթիվ հյուրեր, այդ թվում Ֆրանկոֆոնիայի կազմակերպության նախագահ, Սենեգալի նախկին նախագահ` Աբդու Դիուֆը, ինչպես նաև Ֆրանկոֆոնիայի միջազգային խաղերի մշակութային միջոցառումների պատասխանատու` Բադիան Ալիոունեն, Նիգերիայի մշակույթի նախարարը և ուրիշները: Խաղերի ընթացքում ստեղծված աշխատանքները ցուցադրվեցին Ռաֆիկ Հարիրիի անվան համալսարանի ցուցասրահում կազմակերպված ցուցահանդեսի ժամանակ: Այս ցուցադրությունից ընտրված երեք գեղանկարներ, այդ թվում Արթուր Հովհաննիսյանի ստեղծագործությունը, ցուցադրվեցին նույն համալսարանի կոնֆերանսների կենտրոնի ցուցասրահում: Ցուցահանդեսի բացման արարողությանը ներկա էր Լիբանանի առաջին տիկինը:

Ֆրանկոֆոնիայի միջազգային խաղերը անց էին կացվում 6-րդ անգամ: Չորս տարին մեկ պարբերականությամբ անցկացվող խաղերը կազմակերպվել են աշխարհի տարբեր մայրցամաքներում: Նախկինում այն հյուրընկալվել է Ֆրանսիայում, Նիգերիայում, Կանադայում, Մադագասկարում և Մարոկկոյում: Նպատակ է հետապնդում համախմբել տարբեր ազգերի մշակութային գործիչների, հնարավոր դարձնում վերջիններիս միջև սերտ շփումը, փորձի փոխանակումը: Հայաստանի Հանրապետությունը 2008թ-ին ընդգրկվելով Ֆրանկոֆոնիայի անդամ երկրների շարքը, առաջին անգամ էր հնարավորություն ստանում մասնակցելու Ֆրանկոֆոնիայի միջազգային խաղերին:

Արթուր Հովհաննիսյան

1984թ. – Ծնվել է հուլիսի 8-ին ք. Երևան, Հայաստան

1999-2001թթ – Սովորել է Փ. Թերլեմեզյանի անվան գեղարվեստի ուսումնարանում, գեղանկարի բաժնում

2007թ. – Ավարտել է Երևանի գեղարվեստի պետական ակադեմիան, գեղանկարի բաժին

2007թ. – Ընդունվել է Երևանի գեղարվեստի պետական ակադեմիայի ասպիրանտուրա

2007թ. – ՀՀ նկարիչների միության անդամ է

2006թ. – ՀՀ նախագահի պետական երիտասարդական մրցանակի դափնեկիր

Ցուցահանդեսներ

4 անհատական ցուցահանդեսի հեղինակ է`

2001թ-ից – մի շարք հանրապետական և միջազգային ցուցահանդեսների մասնակից է, այդ թվում`

2003թ. – Հանրապետական երիտասարդական ցուցահանդես ՀՀ նկարիչների միությունում. Մրցանակ`«Լավագույն գեղանկարչական աշխատանքներ»

2003թ. - Հանրապետական երիտասարդական ցուցահանդես «Հայ-Արտ» մշակութային կենտրոնում. Մրցանակ` «Ոսկե ներկապնակ»

2004թ. - Հանրապետական երիտասարդական ցուցահանդես «Հայաստանն իմ հայրենիքն է» ՀՀ նկարիչների միությունում

2004թ. – Ցուցահանդես «Հազարամյակի զարգացման նպատակներ» ՄԱԿ-ի հայաստանյան գրասենյակում

2005թ.- «Մշակույթի միջազգային փառատոն» ցուցահանդես Բաթումիի ազգային պատկերասրահում

2005թ. - “International visual art convention / expo 2005”

2005թ. – Ցուցահանդես նվիրված Մարտիրոս Սարյանի 125 ամյակին. «Ակադեմիա պատկերասրահ» ցուցասրահում

2005թ. – Ցուցահանդես նվիրված «Հայոց Մեծ Եղեռնի 90 ամյակին» ՀՀ նկարիչների միությունում

2006թ. – Երիտասարդական ցուցահանդես Նորարար փորձարարական արվեստի կենտրոնում (ՆՓԱԿ)

2007թ. – Միջազգային ցուցահանդես «Սալոն 2007» Նկարիչների կենտրոնական տուն, Մոսկվա, ՌԴ

2007թ. – «ԱՊՀ երկրների մշակույթի և գիտության գործիչների երկրորդ միջազգային ֆորում» Ցուցահանդես «Ազգերի արվեստը» Խաղաղության և համերաշխության պալատ, Աստանա,Ղազախստան

2008թ. – ՀՀ նկարիչների միության 75 ամյակին նվիրված հանրապետական ցուցահանդես

2008թ. – Հանրապետական երիտասարդական ցուցահանդես ՀՀ նկարիչների միությունում

2009թ. – Ցուցահանդես “Love Magic”, Inter Art Gallery, Նյու Յորք, ԱՄՆ

2009թ.– Վենետիկի 53-րդ միջազգային բիենալե, Վենետիկ, Իտալիա

2009թ. – «Ֆրանկոֆոնիայի 6-րդ միջազգային խաղեր»-ի մասնակից, ցուցահանդեսներ` Բեյրութում Յունեսկոյի պալատի ցուցասրահում և Ռաֆիկ Հարիրիի անվան համալսարանի ցուցասրահում, Բեյրութ, Լիբանան

Աշխատանքները գտնվում են աշխարհի տարբեր երկրների մասնավոր հավաքածուներում` Ռուսաստան, ԱՄՆ, Լիբանան, Կանադա, Ֆրանսիա, Գերմանիա, Իտալիա, Շվեյցարիա:

www.armartist.com

2009թ-ի հունիս ամսին Ա. Հովհաննիսյանը մասնակցել է Վենետիկյան 53-րդ միջազգային բիենալեյին: Աշխարհահռչակ այս ֆորումը իր հարկի տակ էր համախմբել ժամանակակից բազմաթիվ արվեստագետների: Վերջիններիս հետ, բիենալեյին ցուցադրված էին նաև դասական մեծանուն արվեստագետների ստեղծագործություններ: Վենետիկ քաղաքի ամբողջ տարածքով տեղաբաշխված ցուցասրահներում կարելի էր հանդիպել Պոլ Սեզանի, Պաբլո Պիկասսոյի, Ֆրենսիս Բեկոնի, Ռոբերտ Ռաուշենբերգի, Յոզեֆ Բոյսի, Իվ Քլայնի և ուրիշների ստեղծագործությունների ցուցադրություններին: Ա. Հովհաննիսյանը ներկայացել էր`

«Երգչախումբ» և «Ազգային պար» ստեղծագործություններով: