10 տարի առաջ Երևանի գեղարվեստի պետական ակադեմիայի ղեկավարության ջանքերով այստեղ բացվեց ակադեմիայի մասնաճյուղը՝ Ղազար Ղազարյանի գլխավորությամբ: Այն մասնագիտացված է գեղարվեստական գործվածքի ոլորտում: Մասնաճյուղի ուսանողները միայն Դիլիջանի բնակիչները չեն. այստեղ սովորելու են գալիս ողջ Հայաստանից:

Ազգային արվեստի ավանդույթները՝ հատկապես գեղարվեստական գործվածքի բնագավառում, չափազանց կենսունակ են: Մնում է միայն ուշի-ուշով հետևել դրանց: Մասնաճյուղում ուսանողներին հենց դա է սովորեցնում հայտնի նկարիչ, որմնագորգային բազմաթիվ հորինվածքների հեղինակ Հասմիկ Ղազարյանը:

Օգնելով նրանց տիրապետել հարթության հավասարակշռվածության բարդ գիտությանը, հայկական ավանդական զարդերի դեկորատիվ մշակմանը, փորձառու մասնագետը դրանով իսկ ժողովրդական արվեստի իսկական գործեր ստեղծելու ճանապարհ է հարթում ուսանողների համար: Հասմիկ Ղազարյանի դասավանդման մեթոդի շնորհիվ նրա շրջանավարտները դառնում են ոչ թե զուտ գործողներ, այլ՝ պրոֆեսիոնալ ստեղծագործող նկարիչներ: Գորգի առանձնահատկությունը կայանում է կրկնողության՝ տարբերակային կատարման մեջ: Դա ստեղծագործության յուրահատուկ ձև է, որը նկատի ունի «երկրորդական հեղինակություն»: Կրկնորինակելու և հորինելու միջև բացվում է ստեղծագործության կատարողական ձևերի մի ամբողջ համակարգ՝ հազիվ նկատելի մասնավոր փոփոխություններից մինչև իմպրովիզացիաներ՝ նախօրոք տրված սխեմայով: Իսկ գորգագործության տեխնիկայի կանոններին մասնաճյուղում ուսանողներին ուսուցանում է վարպետ Թագուհի Ղուլյանը:

Ցուցահանդեսում, որտեղ բացի գորգերից ցուցադրվիած են նաև որմնագորգեր ( գոբելեն) կամ, ժամանակակից լեզվով ասված՝ տեքստիլային դիզայնը, որին Դիլիջանի մասնաճյուղում հատկացվում է բացառիկ ուշադրություն:

Որմնագորգը Հայաստանում գտնվում է կայացման շրջանում, այդ պատճառով էլ դեկորատիվ արվեստի այս բնագավառում հնարավոր են համարձակ ստեղծագործական փնտրումներ: Մասնաճյուղում կատարվում է լուրջ աշխատանք՝ ինչպես դասական գործվածքի, այնպես էլ ֆակտուրային, ռելիեֆային հյուսվածքների տեսակներում: Մոտեցման հենց այդ լրջությունն էլ արտահայտված են հոբելյանական այս տարվա գեղարվեստական որոշակի արժեք ներկայացնող ավարտական աշխատանքներում: