Անկարելի է այսօր պատկերացնել կյանքն առանց ժամանակակից դիզայնի: Դիզայնը մուտք է գործել ոչ միայն արտադրություն, այլ նաև՝ կենցաղ: Դիզայների հիմնական խնդիրն է շրջապատող միջավայրը, արտադրական ու կենցաղային իրերը գեղեցիկ ու հարմարավետ դարձնելը:

Երևանի Գեղարվեստի Ակադեմիայի դիզայնի բաժինն առաջին ընդունելությունն արեց 1964 -ին.: Ամբիոնի վարիչն էր պրոֆեսոր Աշոտ Միրզոյանը: Այնուհետև ամբիոնը ղեկավարել են պրոֆեսորներ Ալբերտ Բաղդասարյանը, Կարեն Աղամյանը, իսկ այժմ՝ պրոֆեսոր Գագիկ Գևորգյանը: Ակադեմիայում դիզայնի մասնագիտական ուսուցման մեջ հատուկ ուշադրություն է դարձվում ուսանողների կոմպոզիցիոն մտածողության ոչ միայն ինքնատիպ ֆունկցիոնալ լուծումներին, այլ նաև՝ դրանց հումանիտար կողմին:

Դիզայների մասնագիտության դիպլոմը, որ տալիս է ակադեմիան, ընդունվում է նաև արտասահմանյան երկրներում:

Երեսունից ավելի տարիների ընթացքում դիզայնի բաժնում սովորել և ավարտել են շուրջ հիսուն սփյուռքահայ ուսանողներ:

Ինչպես ակադեմիայի մյուս բաժիններում, այնպես էլ՝ դիզայնի բաժնում մեծ քանակությամբ ժամեր են հատկացվում գծանկարչություն, գեղանկարչություն, աշխատանք նյութի վրա առարկաներին, ինչպես նաև՝ նեղ մասնագիտական՝ էրգոնոմիկա, բիոնիկա, գունատեսություն և այլ առարկաներին: Ուսանողների ընդհանուր աշխարհայացքի զարգացման համար կարևոր նշանակություն ունեն արվեստի պատմություն, գեղագիտություն /էսթետիկա/, փիլիսոփայություն և այլ առարկաները, որոնք նախատեսված են ակադեմիայի ուսումնական ծրագրով: Այդ առարկաները դասավանդում են հանրապետության ճանաչված և գիտական աստիճան ու կոչում ունեցող մասնագետները:

Երրորդ տարին է, ինչ դիզայնի ամբիոնում բացվել է նաև մետաղի գեղարվեստական ձևավորման՝ մեծ հեռանկարներ խոստացող բաժինը:

Այսօր դիզայնի ամբիոնում դասավանդում են հանրապետության լավագույն դիզայներներ Գ.Գևորգյանը, Կ.Աղամյանը, Հ.Նիկոյանը, Հ.Փայասլյանը, Ս.Բախչիևը, Ա.Մելիքյանը և ուրիշներ:

Ակադեմիան պետականորեն հաստատված պլանների և առարկայական ծրագրերի միջոցով բարձր որակի մասնագետներ է պատրաստում ընդհանուր դիզայնի, ինտերիերի, էքստերիերի, մետաղի գեղարվեստական ձևավորման, դիզայներական գեղագիտական որակներ պահանջեղ արտադրության, միջավայրի դիզայներական ձևավորման և այլ ոլորտների համար։ Ուսուցման ձևը` առկա։ Ուսուցման տևողությունը բակալավրիատի ուսումնական ծրագրով` 4 տարի, մագիստրատուրայի ուսումնական ծրագրով` 2 տարի։
Ընդունելությունը կատարվում է մրցութային կարգով` «Գծանկարչություն», «Գեղանկարչություն», «Կոմպոզիցիա» առարկաների  քննությամբ։
Արտասահմանի քաղաքացիները ակադեմիա ընդունվում են ըստ ՀՀ կառավարության հաստատած կարգի, առանց ընդունելության քննությունների։