Երևանի գեղարվեստի ակադեմիայի այս ամբիոնը կոչված է կրթելու դեկորատիվ-կիրառական արվեստի տարբեր մասնագիտացումներով պրոֆեսիոնալ արվեստագետներ:

Ներկայումս դեկորատիվ-կիրառական արվեստի ամբիոնում գործում են խեցեգործության, կիրառական գրաֆիկայի, գորգի, գոբելենի և կարպետի, նախկինում նաև՝ ապակու և մետաղի գեղարվեստական մշակման բաժիններ:

Ուսումնական պրոցեսի գիտա-մեթոդական գործունեության հիմքում հայկական արվեստի ազգային հարուստ ժառանգության իմացության վրա հիմնված ազգային ավանդույթների արդիական վերամշակումների և ժամանակակից տեխնիկական ու տեխնոլոգիական գիտելիքների համադրումն է: Վերջինս միանգամայն նոր, պրոֆեսիոնալ որակ է հաղորդում երիտասարդ արվեստագետների ստեղծագործություններին:

Ամբիոնի շրջանավարտները տարիներ շարունակ ներկայացրել են հայկական դեկորատիվ-կիրառական արվեստի տարբեր ճյուղերի նվաճումները հանրապետությունում, ինչպես նաև՝ միջազգային ցուցահանդեսներում և մրցույթներում:

Ակադեմիայի շրջանավարտները տարեցտարի համալրում են Հայաստանի Հանրապետության նկարիչների Միության դեկորատիվ-կիրառական արվեստի բաժինը: Նրանք, զուտ ստեղծագործական նվաճումների հետ մեկտեղ, խթանել են նաև թեթև արդյունաբերության զարգացմանը հանրապետությունում և նրանից դուրս՝ արժանանալով բարձր պարգևների և խրախուսանքների:

Դեկորատիվ-կիրառական արվեստի ամբիոնի վարիչն է պրոֆեսոր Ա.Լեյլոյանը: Ամբիոնում դասավանդում են պրոֆեսորներ Ելիզավետա Գրիգորյանը, Լենմիր Բաղդասարյանը, Նորայր Աղաջանյանը և ուրիշներ:

Ակադեմիան պետականորեն հաստատված պլանների և առարկայական ծրագրերի միջոցով բարձր որակի մասնագետներ է պատրաստում խեցեգործության ստեղծագործական աշխատանքների համար։ Ուսուցման ձևը` առկա։ Ուսուցման տևողությունը բակալավրիատի ուսումնական ծրագրով` 4 տարի, մագիստրատուրայի ուսումնական ծրագրով` 2 տարի։
Ընդունելությունը կատարվում է մրցութային կարգով` «Գծանկարչություն», «Գեղանկարչություն», «Կոմպոզիցիա» առարկաների  քննությամբ։
Արտասահմանի քաղաքացիները ակադեմիա ընդունվում են ըստ ՀՀ կառավարության հաստատած կարգի, առանց ընդունելության քննությունների: