Ամբիոնի վարիչ` ՀՀ մշակույթի վաստակավոր գործիչ, արվեստագիտության դոկտոր, պրոֆեսոր Վիգեն Ղազարյան

Երևանի Գեղարվեստի Ակադեմիայում 1945թ -ից գործում է արվեստի տեսության և պատմության ամբիոնը, որի առաջին վարիչն էր պրոֆեսոր Ե. Մարտիկյանը: Նրանից հետո ամբիոնը գլխավորել են պրոֆեսորներ Վ.Հարությունյանը, Ռ. Մադոյանը, Հ. Փիլիպոսյանը, Լ.Ստեփանյանը: Այժմ այն ղեկավարում է արվեստագիտության դոկտոր պրոֆեսոր Վիգեն Ղազարյանը: Տարբեր տարիներին արվեստի պատմության և տեսության ամբիոնում աշխատել են հայկական արվեստի ճանաչված պատմաբաններ և գեղարվեստական քննադատներ Գարեգին Լևոնյանը, Ալեքսեյ Ջիվելեգովը, Ռուբեն Դրամբյանը, Գևորգ Գոյանը, Սարգիս Մելիքսեթյանը, Լևոն Խալաթյանը և ուրիշներ:

Այժմ ամբիոնում դասավանդում են հանրապետության լավագույն արվեստաբաններ, ճարտարապետության տեսաբաններ և հնագետներ, այդ թվում՝ Հ.Սիմոնյանը, Ֆ.Տեր-Մարտիրոսովը, Վ.Ղազարյանը, Ա.Աղասյանը, Մ.Հասրաթյանը, Մ.Ստեփանյանը, Ա.Մանուչարյանը, Եվգ. Քալանթարյանը, և ուրիշներ:

Ամբիոնի դերն ու նշանակությունն էլ ավելի մեծացավ, երբ ակադեմիայում, ստեղծագործական ֆակուլտետներին կից, բացվեց արվեստաբանության բաժինը /1983թ./, որը կոչված է հանրապետությունն ապահովելու կերպարվեստի պատմաբանների և գեղարվեստական քննադատների կադրերով:

Ամբիոնի գործունեության գլխավոր խնդիրն է ուսանողներին տալ խորացված և համակարգված գիտելիքներ պլաստիկ արվեստների /գունանկարչություն, գրաֆիկա, քանդակագործություն, ճարտարապետություն, գեղարվեստական ստեղծագործության դեկորատիվ և կիրառական ձևեր/ ընդհանուր պատմության, ինչպես նաև՝ տեսական հիմունքների մասին՝ առանձնահատուկ ուշադրություն դարձնելով ազգային կերպարվեստի և ճարտարապետության ուսումնասիրության վրա: Ամբիոնի առջև դրված է ևս մեկ կարևոր խնդիր. ուսանողության մեջ դաստիարակել գեղագիտական բարձր ճաշակ, արվեստի ընկալման, վերլուծության ու գնահատման պրոֆեսիոնալ ունակություն:

Այս նպատակով, ամբիոնում մշակվում են պլաստիկ արվեստի պատմության և տեսության տարբեր բնագավառներին առնչվող դասախոսական ծրագրեր, կազմվում են մեթոդական ձեռնարկներ ու դասագրքեր: Նույն նպատակին են ծառայում նաև սեմինար և ֆակուլտատիվ պարապմունքները, գրավոր ուսուցման զանազան եղանակները /ռեֆերատ, գրախոսություն, կուրսային աշխատանք/, այսպես կոչված՝ «թանգարանային պրակտիկան» /գեղարվեստական ցուցահանդեսների, պատկերասրահների, ճարտարապետական հուշարձանների, հնագիտական վայրերի այցելություն և անմիջական ուսումնասիրություն/:

Ամբիոնի աշխատակիցները զբաղվում են ոչ միայն դասախոսական, այլ նաև գիտահետազոտական գործունեությամբ: Արվեստագիտության դոկտորներ և թեկնածուներ Մ.Հասրաթյանը, Վ.Ղազարյանը, Ա.Աղասյանը, Ֆ.Տեր-Մարտիրոսովը, Ի.Կուրցենսը, Եվգ. Քալանթարյանը և այլոք հայկական կերպարվեստին և ճարտարապետությանը նվիրված գրքերի և հոդվածների հեղինակ են: Նրանց, ինչպես նաև ասպիրանտների ու բարձր կուրսերի ուսանողների մասնակցությամբ, ամբիոնը կազմակերպում է գիտական նստաշրջաններ և կոնֆերանսներ, նպաստում է ինստիտուտի «Արվեստը, պատմությունը և մեր ժամանակը» խորագիրը կրող գիտա-մեթոդական ժողովածուի հրատարակմանը:

Ակադեմիան պետականորեն հաստատված պլանների և առարկայական ծրագրերի միջոցով բարձր որակի մասնագետներ է պատրաստում գիտական, ստեղծագործական, արվեստաբանական, արվեստի քննադատության, թանգարանային գործի, զբոսաշրջության և մանկավարժական գործունեության համար։ Ուսուցման ձևը` առկա։ Ուսուցման տևողությունը բակալավրիատի ուսումնական ծրագրով` 4 տարի, մագիստրատուրայի ուսումնական ծրագրով` 2 տարի։
Ընդունելությունը կատարվում է մրցութային կարգով` հայոց լեզու, ընդհանուր կերպարվեստի պատմություն (գրավոր և բանավոր) առարկաների  քննությամբ։
Արտասահմանի քաղաքացիները ակադեմիա ընդունվում են ըստ ՀՀ կառավարության հաստատած կարգի, առանց ընդունելության քննությունների։